ConneXion Pam

Depi mwen tou pitit mwen tande yap di “ si w pa vote yo ap vote pou ou”. Siman menm jan avèm lem potko gen konprann wap mande ki yo?

Men se pa ke yon moun pral vote sou non ou, men se jis ke vòt paw lan tap konte, li te ka fè yon diferans. Se sa ke mwen fini pa konprann avèk jou ki pase.

Eleksyon nan peyi Dayiti, se toujou traka, tèt chaje. Se yon bagay ki toujou soulve anpil deba, pale anpil menm sou chwa politik. Men o final, tout rete pawòl anpil, paske pa janm gen anyen konkrè ki fèt.

Lè eleksyon rive, chaje kandida, chanje pati potilik, sim ka rele yo pati potilik. Men anpil moun toujou ap di, ke kandida yo sou blòf, ke se bèl diskou yo genyen, ke yo a loral. Aprè eleksyon yo pap fè anyen. Sim ka chita sou eleksyon pase yo jiska monte prezidan yo, gen moun ki gen rezon ak sa ke yo di.

Anpil fwa kandida yo se pote bèl espwa pou pèp Bondye a epi lè yo monte sou pouvwa ou pa finn konprann kisa yo ap regle.

Men kounya se konbyen moun ki te vote prezidan sa? Eske jènn ki nan peyi a te vote pou li? Eske moun ki nan klas mwayèn nan te vote pou li? Eske moun ki nan klas siperyè te vote pou li?

Paske daprè konsta ke yo fè se toujou mas pèp la ki vote, paske se yo menm ki toujou ap kouri dèyè ale mye. Yap teke grenn mayi pou yo wè si ya tombe sou sila ki pral delivre yo a.

Men eskè se yon prezidan ki pral vinn delivre yo jan yo ta panse l la? Eske jan Ayiti ye la kounya, yon sel prezidan ap ka chanje sitiyasyon peyi a ? Eske sistèm nou ladann nan pa merite pou yo ta chanjel, eseye yon lòt bagay?

Mwen konnen anpil nan nou genyen eleman repons ak kesyon sa yo, men ann fè pwen sou kesyon vote a.

Genyen plis pase 10 kandida nan eleksyon an, mwen dakò kew ka pa kwè yap ka fè yon bagay. Men m rete kwè genyen ki gen volonté e deja volonté a se yon bon bagay. Men kounya pinga w dim kew pap sipote okenn kandida. Ou ka pa dako ak projet tout men gen youn ou pi pa vle pou peyia. Gen youn nan projet li, ou wè li ale nan sens ou, projet li yo rive nan zorey ou, e ou konstate yo ap bon pou peyi a. Kidonk sa mwen vle di se ke ou sipoze fè yon chwa pa pa ou menm espesyalman men yon chwa pou peyi a. Paske vote se yon devwa sitwayen e se vòt paw la petèt ki ka fè yon diferans. Si kew pa renmen yon sitiyasyon ou dwe batay pou w chanjel .

Gen jènn ki diw yo pa pral vote. Anpil fwa yap fè etid relasyon entenasyonal, yo nan sosyoloji, yo nan medsin, yo nan etid de dwa. Yo konn pran pretèks ke yo pa pral riske lavi yo pou yo vote, paske jou eleskyon an Ayiti konn gen problem ensekirite. Mwen pa di ke Eleksyon toujou byen pase, men siw genyen volonte pou w al vote, wap ale byen bonè, pouw gentan ranpli devwa sivik ou.

Men la ankò sa fè lapènn pou w wè jènn nan peyi a pa vle vote. Lèw pa vote se pakse ou pa enterese a sitiyasyon peyi kotew ap evolye a. Paske nan nenpot domènn ke wap evolye ou pral bezwen pou konjonkti peyi a nan favèw. Kidonk ke w t medsen, avoka,enjenyè… fok ou vote.

Pinga di ke ou pap fè politik, politik fè pati de vi a.

Mwen ankouraje tout moun al vote ….

XOXO

Jodia jedi li dizè pou kotem ye a. Malgre ke mwen fatige men se ekri mwen ka ekri lè mwen anvi degaje sa ki nan mwen.

Depi kèk jou sou rezo sosyo sonw zafè festi masimadi ki ap pale. Siw pat o kouran banm baw yon ti limyè. Se yon festival yo ta pral òganize nan peyi Dayiti pou masisi ak madivinèz. Tout moun ap pale de sa, chak moun gen opinyon pa yo sou sa ki pral fèt la. Gen yon pakèt deba ki fèt. Senatè voye pye, kanpe an kwa pou festival la pa fèt.

M pap ba nou manti, mwen fè anpil efò pou mwen pa prononsem sou sijè a. Lè mwen monte sou rezo sosyo yo depi se yon pòs ki gen rapò ak sa mwen pase sou li. Mwen pa vle rete sou sa. Plizyè moun mandem opinyon mwen sou sa, mwen te chwazi kite opinyon an pou mwen. Paske anpil moun sa yo, sa yo pral vle mwen di a, se pa li mwen pral di. Kidonk mwen kenbe opinyon mwen.

Men talè a yon zanmim sot vini ak bagay sa ankò.

Mwen ba li yon ti kras de sam panse san ke mwen pa ale twò lwen. Men lè li dim ke li menm li pa gen problèm ak moun yo men ke yo fè zafè yo an prive. Se sa ki enèvem nan.

Mwen pa konprann kijan fè nou menm lèzòm nou renmen benyen nan ipokrizi konsa?

Bondye fè chak moun lib, lontan se te plis yon problèm ak bagay oryantasyon seksyèl yon moun, men avèk tout pil konvansyon entènasyonal, tout lwa ki etabli. Vinn genyen yon ekilib pou mwen pa di yon egalite pou tout moun. Kidonk chak moun lib nan chwa seksyèl yo. Oryantasyon seksyèl yon moun pa defini li antan ke imen. Mwen rete kwè ke nou ta sipoze renmen tout moun pou mwen pa di pwochen nou jan ke Bondye mande l la. Menmsi oryantasyon seksyèl li pa menm avèw. Sa se chwa ke li fè, li pa dwe deranjew.

Mwen konnen gen moun ki pral mande pouki map defann koz masisi oubyen madivine? Nou konnen bagay la egziste gen moun nan antouraj nou ki konsa, men nou pito fè tankou nou pa konnen oubyen si nou pa konnen vre. Nou pa ta janm swete konnen paske moun sa nou ka pa menm rive pale avel anko.

Men mwen se poko janm sa ki preyokipasyonm

Pi gro problèm mwen se paske mwen ap gade tout enèji ki depwalye pou sa. Tandis ke pa si lontan ke sa. Anpil moun tap pèdi lavi yo a koz pat gen swen nan lopital piblik yo, ensekirite nan peyi a menm se pa pale. Lekol ap ouvri paran yo nan tout tèt kase pou voye timoun yo lekol. M pat janm wè tout pale anpil sa yo, tout mouvman leve kanpe sa yo, tout enèji sa yo m pat wè yo. Tout pote kole senatè sa yo mwen pat wè yo. Eske pat ko gen lachanm?? Map mande tèt mwen eske pat gen moun nan lachanm??? Kibo tout enèji sa yo soti???

Mwen dakò ak moun ki di ke Ayiti poko pare pou sa. Ke daprè la lwa maryaj omo pa legal nan peyi a. Men kom se “poko pare” donk yon lè lap pare? Kidonk nou dakò ke se yon bagay nou pral oblije aksepte, viv ak moun ki konsa? Men pou kounya nou pito benyen nan ipokrizi a, moun sa yo la nan sosyete a men ann inyore egzistans yo, ann fè komsi Ayiti pat gen masisi ak madivine…. Anpil fwa menm moun kap denigre masisi madivine, yo pi gro masisi oubyen madivine se nou

Bann ipokrit regle bagay ki bon pou peyi a. Sispann aji lè sa an favè nou, men aji toutbon pou Ayiti.

Medite, se bagay mwen fè chak jou, paske jan mwen toujou ap di, mwen ap aprann dekouvri tèt mwen plis chak jou, epi anpil fwa ti tan mwen pran poum reflechi sou kek bagay konn aprann mwen anpil sou moun mwen ye a.

Mwen reyalize jodia mwen gen anpil moun nan antouraj mwen ki pap ede m avanse, mwen genyen anpil moun nan antouraj mwen ki reprezante maleng ki pa seche nan lavim. Anpil fwa nan chache konnen ki moun ou ye, ou konn pè sa wap dekouvri a pa deranje moun ki nan antouraj ou. Kidonk, depi w fè konsta sila, antouraj ou pa bon.

Antouraj ou, se fanmiw, moun ou di mennaj ou a, epi moun ou rele zanmi yo. Zanmi w lan ap gade yon bagay ki pa mache nan sens ou, li ta vle w gade l avèk li, oubyen ou pa ka di li ke w pa renmen l. Bon m sonje m te pale sou bagay konsa nan yon tèks mwen te ekri (li dekouvri-kel-gen-pouvwa-vinn-we). Kote m tap pale tout ipokrizi ki egziste nan relasyon moun ak moun, nou sipoze chanje. Se pa menm bagay sa mwen vinn pale jodia. Jodia mwen vinn pale sou kiyès pou nou kenbe ou kiyès pou nou lage.

Le mwen poko te gen konprann, mwen te konn wè mal, lè gen kèk kretyen ki pa chwazi pale ak moun ki pa kretyen parèy yo. Gen paran tou, ki konn pa asepte pitit yo fè nenpot frekantasyon. Men jounen jodi, mwen wè sa yon lot fason.

Gen anpil liv mwen enspire nan yo spesyalman mwen aprann anpil nan LABIB, ke ou kretyen ou pa. Gen kek bagay ki fè sens epi ki gen tout lojik yo nan pawol biblik yo. Nan 1 korentyen 15:33, yo di "move zanmi gate bon levasyon". Kidonk, antouraj nou jwe yon gwo wol nan lavi nou. Se rezon sa kifè jodia mwen envite nou triye, triye nan moun ki nan antouraj nou. Kiyès w ap retire oubyen kiyès k ap rete nan lavi w. Paske anpil fwa nou di moun pa enfliyanse nou. Men antouraj nou konn gen enfliyans natirèl nou pa ka kontrole sitou nou konn pa menm rann nou kont enfliyans yo genyen sou nou.

Anpil fwa yo degize yon pakèt bagay ba nou pou fè nou kwè se verite absoli. Yo aprann nou lanmou se yon santiman nou pa ka kontwole. Bon kisa m vin chache nan lanmou? Nou ka panse m ap pèdi fil panse m. Men kite m fini w ap wè mwen toujou menm kote a.

Pou n pouswiv, mwen rive nan bagay lanmou sa, paske anpil fwa nan relasyon nou, nou toujou ap bay lanmou pote chay. Demwazèl la fini lekol, li se yon timoun ki entelijan, li renmen li, li santi l konsènè pa sosyete a, li se yon moun ki renmen reflechi, li se moun ki renmen pataje ide ak lot moun pou li aprann plis, li se moun ki toujou ap aprann, l ap chache verite, epi ou tande li renmen ak yon nèg ki pa fini lekol, nèg la pa menm ka fè yon bon refleksyon, nèg la pa gen okenn vizyon, tout sa ki enterese li se materyèl epi li pa menm travay pou li ta gen materyel la… kidonk yon nèg konsa ak yon fi konsa, eske yo konpatib? Eske yo ka viv ansanm antan ke koup?

Gen moun ki pral di w ui, konsa tou genyen sa ki ap di w non kategorikman. Ou menm kisa ou panse? Eske yo konpatib? Nan tèt ou wap mande ki opinyon m pa rapò a sa. Ebyen pou mwen menm yo pa konpatib, se sak fè mwen chwazi lanmou an. Moun ki kwè ke yo konpatib pral di w lanmou pa gen nivo, lanmou pa gen tout bagay sa ladann…Mwen fou pou nou lè nou ap reflechi konsa.

Kijan fi sa pral fè avanse? Kijan nèg sa pral santi l? Eske y ap alèz? eske y ap ka kominike tout bon. Nou chita sou lanmou, nou rete inyoran, nap benyen nan ipokrizi pou nou jwenn eksplikasyon sou sa nou jije ki pa rezonab.

Ebyen se menm kote a mwen te ye, antouraj ou. Moun ou di ki nèg ou a, oubyen fanm ou an. eske chimen pa l ak pa w kwaze? Eske w wè menm si nou pran wout diferan nou pwale menm kote? Eske nèg sa, oubyen fanm sa, lè n ap pale ou gen yon bagay ou aprann? Mwen dako chak moun gen konviksyon pa yo, men moun ki bo kote w la , zanmi w lan, fanmi w lan, mennaj ou a. Eske se moun ou santi fok ou kache yo kek bagay paske yo pap konprann ni chwa w ni desizyon w?

Jan mwen te komanse an, mwen reyalize m oblije fè yon triyaj nan lavi m, oubyen elwanye m de kek moun ki nan antouraj proch mwen, paske yo pa ede m avanse, avèk yo mwen pa ka moun mwen ye a, avèk yo mwen manke rete fikse sou sa m vle akonpli. Imajine w pou moun ki zanmi w, mennaj ou oubyen menm fanmi w, ou pa ka pale de kwayans ou ouvètman avè yo, ou pa ka bay opinyon w sou yon sijè san kache, ou pa ka reyalize rèv ou paske yo toujou ap dekouraje w, di w men sak bon men sak pa bon, yo pa kwe nan potansyèl ou. Moun sa yo se pwazon yo ye nan lavi w. Si w rekonèt kek moun konsa nan antouraj ou. Retire yo nan lavi w san bri san kont. Pale avel dil ke wap chache matirite, w anvi vinn gran, w anvi dekouvri sa mond lan genyen ladann. Di moun nan sensèman ki rezon ki fè w ap retire l nan lavi w, pa ledmi pinga fache. Si moun nan pa ka rive konprann, ret fè m nan konviksyon w paske moun sa pa te bon pou sante lavi w.

Aprann konnen kiyès n ap frekante. Se te ti refleksyon sa m tap pataje ak nou. Mwen te ka di plis. Men m ap tounen sou sijè a.

Xoxo

************

Nan mond n ap viv la, gen yon pakèt pwoblèm ki te egziste depi lè wa te kaporal men nou fèmen je nou sou yo tankou yo pa egziste ankò. Mwen menm dizan pase ou ta di m rasis egziste toujou m tap di w manti. Paske Nelson Mandela, Rosa Parks, Malcom X, moun sa yo te mennen yon lit pou egalite ras yo.

Men nan tout ras ki egziste se Ras Nwa a ki pi vilnerab, se ras nwa a yo pi meprize. Men nou menm tou nan kominite nwa a, nou rann tèt nou vilnerab.

Depi kèk jou nou tande polisye blan ap tire moun nwa pou granmesi. Gen anpil deba ki fèt sou sa, anpil mouvman leve kanpe antreprann, tankou #BlackLivesMatter. Anpil moun revolte fas a sitiyasyon sa yo. Kit se nan pawòl yo, kit se nan aksyon men gen anpil moun tou ki kanpe pou di #AllLivesMatter. Bon daprè Labib m dakò tout vi konte men gen anpil moun ki pa konprann ke lè yo di Black Lives matter (vi nwa yo enpotan) se pa ke yo di ke vi lòt yo pa enpòtan men jis ke se nwa ki pi vilnerab.

Men Jodia mwen ta renmen fè yon ti retou nan listwa. Depi mwen piti, mwen ap tande non kap site tankou Dessalines, Toussaint Louverture, Boukman, Martin Lutter King, Rosa Parks, Malcom X, Nelson Mandela. Yon pakèt non ki make listwa epi ki vle di anpil bagay pou kominite “NWA” a. Gen ki lite pou endepandans yon nasyon lot menm ki lite pou egalite yon kominote.

Men malgre tout bagay sa yo, depi nou piti, yo pa janm ede nou konprann sakrifis sila yo. Yo sèlman aprann nou sa yo vle, anpil fwa nou pa poze bon kesyon yo pou nou ka jwenn repons, nou kontante nou a sa yo aprann nou. Ou menm ki moun nwa depi w tou piti, yo fè w konprann ou enferyè a lòt ras yo. Mwen menm nan sa m aprann sa m konstate, mwen fini pa konprann se bagay yon rantre nan tèt nou depi nou tou piti. Gen nan nou ki ka pa dakò ak sa m di an, konsa tou genyen ki ka dakò. Men sa m di an li mande yon eksplikasyon.

Lè mwen di konsa enferyorite nwa se yon bagay yo rantre nan tèt nou, mwen vle di kisa??? Lè ou timoun w al lekol, ti moun ki pi klè pase w la tout timoun anvi jwe avè li la, sa ki gen bèl cheve a tout timoun ta renmen zanmi l, tout profesè apresye l, kidonk menm siw timoun gen yon nivo konpreyansyon ou poko genyen men ou gentan santi epi konpran fòk ou ta nan plas timoun sa. Ou ta renmen gen anpil zanmi tou, ou ta renmen profesè a renmen w tou. Depi la santiman enferyorite a komanse devlope lakay ou. Ou menm adolesant , depi ou pwal pase nan nivo segondè ou ta renmen mete pèmanant pou cheve w ka swa. Paske ou santi cheve grenn nan pa bon, ou vinn santi w ou manke yon bagay, ou santi ou pa bèl. Paske depi w piti, se konsepsyon sa ou genyen sou bèlte, paske tout postè, nan tout televizyon se sa yo vann nou pou bèlte, pou fi a bèl fòk cheve nan tèt li swa. Tout bagay sa yo se paske nou genyen yon santiman enferyorite, nou tèlman santi nou enferyè nou anvi raproche nou sou blan. Wi nou anvi raproche bò kote blan paske blan gen cheve swa pou nou ka santi nou menm jan an tou nou mete prodwi chimik pou cheve nou ka swa. Lè nou santi pèmanant lan pa ase poun sanble ak blanc, nou depigmante po nou, nou pase prodwi sou po nou pou nou ka gen koulè blan paske santiman enferyorite a ap kale nou, nou pa ka sipòte ankò.

Nou toujou ap pale moun rasis poutan nou menm nwa se nou menm ankò ki montre blan nou enferyè a yo tout bon vre, paske nou ta bay tout sa nou genyen poun blan ak cheve swa. Lè nou fè sa se pwouve nou pwouve po nou ak cheve nou yo enferyè. Men se pa konsa nou rete nou anvi sanble blan, se paske sosyete a se sal voye kom imaj ba nou. Pou yon moun bèl fòk po li klè, pou yo ba w respè fòk ou se milat. Milat la chaje respè, dèfwa nou gentan menm jije moun nan sou koulè li pou nou di kel gen kòb. Kidonk moun nwa toujou pòv. Tout bagay sa yo se pa nou menm ki foje yo, nou vinn jwenn yo la. E sa ki pi mal nou kwè nan yo san poze kesyon. Se poutèt sa mwen di ke depi tou pitit yo rantre sa nan kalbas tèt nou lòt ras yo siperyè a nou menm.

Anplis yo foure sa nan lespri nou nou enferyè a lòt ras yo. Nou menm nou vinn renye ras nou an pa rapò a reyalite sa yo ba nou an. Kisa mwen vle di ? Nou menm nwa se nou menm ki pa renmen reyalite ke nou se “NWA”. Depi yon moun mix, le mwen di mix lan mwen vle di paran yo se 2 ras diferan. Si youn nan paran li yo nwa epi li menm li gen yon po klè li di w li pa nwa. Bon daprè lasyans moun nan mix, li son metis. Men san w melanje ou pa rete w ap di ou pa nwa. Poukisa ou oblije voye jete pati nwa ki nan ou a? Gen yon lòt bagay ankò, sa li se ri li fè m ri. Ayisyen ki pa milat yo, ki gen yon ti koulè klè. Yo di w yo pa nwa. Bagay sa jiskounya le mwen tande yon moun di m sa m oblije ri. Koulè po w pa nwa men se yon nwa ou ye. (Wouch)

Imajine w depi yon gason Nwa wè yon fanm ki gen po klè li di w “ wouch gade yon bèl fanm” poutan lè li wè yon nwa li di “ black sa anfom ui” si m byen konprann, sila ki gen po klè a se yon fanm sila ki gen po nwa a se yon black (Wow). Epi wa p tann pou blan an valorize w bon ou menm ou pa valorize pwop ras ou.

Nan obsèvasyon mwen fè, nou menm majorite moun nwa nou pè moun nwa parèy nou. Egzanp:n ap mache lanwit gen yon nèg nwa ki ap mache dèyè nou, kè nou preske rete, nou prese mache pou nou rive kote nou prale a. Pakont si se te ye yon blan n ap ralanti demach nou pou nou nan preske menm nivo avèk li paske n ap santi nou pi an sekirite. Epi kijan fè vle blan an pa sispèk lè yon nèg nwa ap mache dèyè li?

Yon frè nwa nou ap ouvri yon biznis a kote a gen yon biznis blan se nan pa blan an n ap antre paske nou gen mantalite sa bagay nwa pa janm byen mache oubyen pa janm bon. Kidonk se yon pakèt bagay ki fè blan pa respekte nou epi santi yo siperyè pase men se nou menm menm “NWA” ki ba yo posibilite pou yo menm panse konsa. Paske nou menm anko nou santi nou enferyè.

Men mwen menm jodia a ki ap ekri sa, gen yon epòk nan vim enferyorite sa te nan mwen, mwen te jis pa aksepte li, men jodia zye m louvri mwen wè klè. Depi mwen tou piti, yo fòje yon imaj moun nwa ban mwen mwen deside chanje imaj pam. Mwen vle chanje imaj yo pa sa mwen obseve. Wi mwen dakò ka gen kèk moun nwa ki gen move konpòtman ki ka fè yo mete tout nwa nan menm panye. Menm jan an tou gen anpil moun blan kifè menm bagay sa yo n ap kritike nwa yo pou li a. Men se jis ke paske se nwa nou estime li pi grav. Epi blan yo pap janm konsidere parèy yo menm jan nou konsidere parèy nou.

Mwen reyalize se nou menm ki rann tèt nou enferyè paske nou pa janm batay pou nou gade valè nou epi kenbe tout sa ki fè nou nwa. Nap kouri dèyè blan.

#BLACKLIVESMATTER

Gen yon epok lè mwen wè yon fi abiye e tout kol deyo mwen te konn jije sa. Mwen te konn jwenn anpil atribisyon pou moun sa. Men toutotan map grandi, mwen vinn ap chanje atribisyon sa yo pa lot.
Yon jèn fi ki chwazi abiye kote li ekspoze kol, ou menm ou ka relel limena, ou ka relel (bouzen) padon pou mo a men se kreyol kap pale . Men anpil fwa nou di ke se moun ki pa edike, ki pa fome, nou di se moun ki pa gen vizyon, ki pa gen objektif elatriye.
Men kounya ann poze kesyon ansanm?

Kisa ki yon limena?
kisa ki yon bouzen?
kilè yon moun edike?
kilè yon moun fome?
kilè yon moun pa gen vizyon?
kisa ki yon objektif?

Mwen menm pèsonèlman mwen pa konnen kisa ki yon limena, paske mwen pa konnen si gen yon kote ke sa defini, petèt ke nou rive atann nou sou kisa ki ka fè yon moun limena men bon. apresa lot kesyon yo mwen pa pral antre nan detay, si nou pa konnen repons yo al chache mot yo nan diksyonè nap we kisa yo vle di. Paske mwen pa vinn pale de movèz intepretasyon mo yo men mwen vinn pale de kijan nou wè ak ki zye nou gade. Se vre anpil fwa nou mal itilize mo yo, men mo yo se youn ak ki zye ou gade se yon lot. Anpil fwa zye nou louvri byen gran nap gade men mwen menm avèw pa wè menm bagay.
Nan yon deba mwen tap fè avèk yon kolèg mwen, li dim yon bagay ki kembe atansyonm, li dim " eskew ka banm o mwen yon bagay tout moun alawonbadè dako sou li nan mond sa? mwen pap bay manti jus kounya map chache mwen poko jwenn. Antouka si ou menm nan moman wap li sa ou konen youn wa kite yon komantè pou ou edem konnen kisa. Kidonk se poum montre nou ke nou pa gade ak menm zye e sitou nou pa wè menm bagay.

Nou ta toujou swete sa, nou vle sa, nou menm ap fose sa, dèfwa pou moun ki bo kote nou an ka wè bagay la menm jan avèk nou. Anpil fwa lè nap ekspoze yon sitiyasyon bay yon moun, anvan menm moun nan ta bay opinyonl, nou gentan asire nou ke depi nan ekspozisyon sitiyasyon an nou mete tout agiman ki pou fè moun nan ale nan bo pa nou an. Gen moun ki tèlman kwè nan konviksyon yo malgre nou fè sa, konn pa dako, lè konsa nou twouve moun sa gen yon pwoblèm.
Nan yon entèvansyon kote yon aktris Ayisyèn( GESSICA GENEUS) kem renmen tap pale, epi li tap pale de Yoga epi gen yon fanatik ki te dil ke "yo di ke Yoga se bagay Satan" AKtris lan te mandel "ki koulè Bondye ye e ki koulè Satan ye pou ou? Donk sete yon fason poul te reponn moun nan ke sa pwal depann de a ki zye wap gade.
Poum rete nan sijè kem ye a, ki se ak ki zye ou gade ? Nap wè anpil fwa nap jije, nap kritike se paske nap gade e se sa nou vle wè ke nou wè. Anpil fwa bagay la devan je nou men nou pap eseye wèl menm jan kem wèl. Atansyon !!!!!!!!! mwen pa mande pesonn pou ale nan menm chemen avem. Chak moun gen opinyon yo mwen respekte sa, e sa mwen ta renmen ke anpil moun rive fè nan sosyete nap viv la. Respekte opinyon moun ki bo kotew la.

Pouki rezon ou pa renmen yon bagay, men ou gen pwoblèm ak moun ki fèl la? Men moun ki pa renmenl li a se ou menm, e moun ki fèl la menm si li ta yon moun nan antouraj ou, li fèl pou tèt li, li pa fèl pou ou menm. Lotjou map reflechi mwen santi kem tankou sonw moun ki pèdi libetel paske gen bagay mwen ta renmen men map mandem eske mwen pap blese kèk moun, men nan menm moman refleksyon an mwen sonje kem lib e ke pa gen pyès moun ki ka pran libète sa. Paske mwen menm, mwen gen konsyans ke gen anpil moun ki pa wè bagay yo janm wè yo a.

Poum tounen sou koze abiye sa, kidonk poum fini. pou mwen menm yon fi ki abiye ki ekspoze kol se yon fi ki avan tou konfidan e ki sitou konfotab nan pol. Mwen garanti nou ke yon moun ki gen konpleks ak kol, ki pa gen konfyans nan tet li, pap janm abiye konsa. Donk kounya se konsa mwen wel. sa ka rive ou pa wel menm jan avem, sa pap deranjem men chak moun gen opinyon pa yo. Respekte pa moun ki chwazi alez nan pol la, ki gen konfyans nan tet li a.
Aprann respekte chwa yon moun, paske nou pa wè bagay yo menm jan......

XoXo

Inscription à : Articles ( Atom )

ConneXion Pam

Ayiti se nou, ann al vote

Festi Masi-madi est ce le vrai problème?

Move zanmi gate bon levasyon

#BLACKLIVESMATTER

TonyMix Ambassadeur et alors?

Chevem se idantitem

Li dekouvri kel gen pouvwa, vinn wè kiyès nan pouvwa yo